鳳凰城晉級西岸決賽，最激動嘅肯定係已年屆37歲嘅老將格蘭希爾，事關希爾15季NBA生涯之中，從未試過喺季後賽晉級，更何況今次係殺入分岸決賽，如今一切全屬希爾之初體驗。
16年前，格蘭希爾一度被譽為世界上最有天分嘅籃球員，首季順利奪得最佳新秀獎。可惜轉投魔術後卻飽受傷患困擾，効力6年間坐多過打，根本冇機會大展拳腳，難怪希爾今季之前只曾出席過六季季後賽，但全部都首圈出局。
幸好希爾自加盟太陽後擺脫「玻璃腳」污名，近兩季常規賽更只曾缺席一場賽事，證明呢位老將寶刀未老。而希爾喺今輪對馬刺亦表現出色，頭三戰平均攻入14.3分，協助球隊打出一個完美開局，最終橫掃馬刺令不少人大跌眼鏡。