大帝手傷隨時收咧！
「大帝之手」出咗事，騎士爭標現暗湧！「大帝」勒邦占士早喺Playoffs東岸八強硬撼公牛時，已承認自己右手手肘有傷，初頭外間以為「大帝」超人嘅身體質素應該頂得住，但原來經過連場劇戰後，傷勢日漸嚴重，占士在不足10日內竟然要做3次磁力共振，依家連攞起籃球都有問題，有提早收咧之虞！
勒邦占士日前主場對塞爾特人時只得24分，狀態急跌，完全打唔出常規賽ＭＶＰ嘅光芒，更不尋常係佢大部分時間轉用左手帶波，令傳媒開始揣測占士傷勢可能比預期嚴重。尋日有知情人大爆占士手肘嘅傷勢已影響手臂嘅動作，依家甚至連攞籃球都有難度，已經唔適合再落場比賽，如果唔想加劇傷勢，最好就係休息。
騎士明鬥塞爾特人不樂觀
縱使消息未經騎士證實，但可以肯定係勒邦占士最近喺少於10日內，３度去接受磁力共振，徹底檢查手肘傷勢。為咗支持占士，最近有人以「占士右手肘」登入Twitter，結果喺短短幾日已累積4,783個追隨者。
早幾日占士負傷上陣，騎士喺主場都畀塞爾特人打到落花流水，佢一旦真係提早收咧，騎士爭標機會凍過水，聽日第３戰騎士作客鬥塞爾特人，表現令人擔憂。
雖然占士可否再打季後賽有變數，但佢之前喺常規賽嘅表現仍獲一致肯定，除蟬聯ＭＶＰ外，尋日就入選今季ＮＢＡ最佳防守一隊，係佢連續第２年入選。
最佳防守一隊
杜域侯活（魔術）
勒邦占士（騎士）
謝勒華萊士（山貓）
朗度（塞爾特人）
高比拜仁（湖人）
最佳防守二隊
鄧肯（馬刺）
祖斯史密夫（鷹隊）
華拿祖（騎士）
韋迪（熱火）
史科路沙（雷霆）
■本報綜合報道