湖人轟走雷霆入次圈
衞冕冠軍湖人尋日都算贏得驚險，中鋒加素（圓圖）喺最後時刻幫高比仔「補籃」，協助湖人以95比94反勝雷霆，終於打開今季季後賽作客勝利之門，同時亦以4比2晉級次圈，總算威番鋪！另一仗爵士亦於第六戰解決對手，以112比104擊敗金塊，次圈將會硬撼湖人。
湖人尋日重臨雷霆地獄主場，自然受到「藍衫軍」激烈「招待」，全場球迷不斷呼喊「Beat LA」，繼續玩聲煞！可惜今場失準嘅並非高比拜仁，反而係雷霆當家球星KD杜蘭特，呢位新任得分王受制於「防守專家」阿堤斯，全場23投5中，命中率僅得兩成左右，成為雷霆致敗主因。
雷霆本應有機會翻身，球隊在最後兩分鐘反先湖人1分，可惜韋斯布克接連三次起手射失，結果讓高比拜仁有機會組織最後一個攻勢，當時高比仔選擇「自己嚟」但射失，幸好伏兵籃下嘅加素搶得籃板球並即時補中，協助湖人險勝95比94，驚濤駭浪地晉級次圈。功臣加素賽後表示，協助球隊贏波固然興奮，但同時亦大讚對手雷霆表現出色，令湖人陷入苦戰。
傳媒爆料占士攞MVP
湖人晉級後將會面對爵士挑戰，後者同日以112比104擊敗金塊，總成績4比2淘汰對手。另一方面，克里夫蘭傳媒日前透露，「大帝」勒邦占士已成功蟬聯常規賽MVP寶座，只是賽會仍未公布，而今屆MVP結果將會在美國時間周日公布。