爭搭尾車公牛勢演屠龍記
【本報綜合報道】NBA聽朝上演「尾班車大戰」，正爭奪季後賽東岸第八位嘅速龍與公牛將正面交鋒！兩軍尋日分別輸波，形勢冇變，同屬38勝41負，但速龍在今季對賽上領先2比0，所以贏埋今場嘅話，幾可肯定搭上尾班車。可惜主隊速龍缺少「龍王」保殊坐鎮，作客嘅公牛有望取勝。（有線體育台62及165台周一早上6時直播）
速龍缺保殊難爭勝
速龍想搭上季後賽尾班車，明顯較公牛多障礙，首先係近況唔好，計埋尋日輸畀鷹隊在內，常規賽四連敗，想谷都谷唔起。此外，主將保殊早前對騎士被批爆面，估計餘下常規賽都要養傷休戰，冇咗呢位領袖兼得分點，速龍明顯群龍無首，難以爭勝。
雖然公牛亦唔抵爭，尋日竟然戰至雙加時下，以116比127不敵籃網，但單計近態，佢哋近五場贏三場，點都好過速龍。再者，公牛在今季對賽上不及速龍，頭兩戰都輸畀對手，若然今場再輸，最終戰績相同都會無緣季後賽，料教練迪尼高一定視今場為生死戰，公牛受讓較為值博。另方面，湖人尋日雖有高比拜仁缺陣，但憑加素奪「雙雙」29分15板，以97比88擊敗木狼，鎖定成為西岸冠軍。