畀傑特抖抖！小牛照殺狼
NBA近期狀態最好嘅球隊，非達拉斯小牛莫屬，即使小牛尋日收起主將傑特，等呢位即將37歲嘅老將休息，但是依然以112比109擊敗木狼，連贏9場，明日主場鬥帝王，有希望取得10連勝佳績。
泰利爆鼻打得更火
小牛尋日贏波功臣係泰利同魯域斯基。「第六人」泰利取得全場最高嘅26分，佢喺第三節被撞爆鼻，一度退下火線，但治療數分鐘後立即返回球場，而且有出色表現，主將魯域斯基亦有22分進帳，包括罰球10射10中。
小牛喺明星賽後經歷「地獄賽程」，要喺16日內打10場，由於傑特年紀有番咁上下，今個月就37歲生日，所以小牛教練卡素爾決定畀佢休息。
傑特今季正選上陣60場，平均上陣36分鐘，僅尋日一戰缺席，佢喺周日對鷹隊大發神威，食出職業生涯第104次「大三元」，但唔知係咪搏得太盡，佢喺之後對山貓一戰疲態畢露，起手9次僅入1球，今次叉足電，聽日對帝王應有較佳表現。
本報綜合報道