高比拜仁強勢回歸！因傷休戰多場比賽嘅湖人當家高比拜仁，尋日終於傷愈復出戰灰熊，結果「叉足電」嘅高比仔果然交到貨，全場攻入32分，並且射入致命三分球助湖人以99比98絕殺灰熊，而今場亦係高比仔十四年職業生涯第1000場常規賽，令佢以31歲184日，成為ＮＢＡ史上最年輕嘅「1000場先生」，打破塞爾特人前鋒加納特保持嘅紀錄。

高比仔早前受腳傷影響，缺陣三場常規賽及明星賽，結果尋日回歸，並以正選上陣。高比仔明顯返晒嚟，全場起手19次入13球，攻入32分並搶得７個籃板球及交出６次助攻。此外，佢亦成為贏波主角，在賽事剩餘4.3秒時射出絕殺三分，助湖人以１分險勝灰熊。