縱然達拉斯受暴風雪吹襲，縱然明星賽前飽受傷患潮困擾，高比拜仁及基斯保羅等球星一個一個退賽，但依然無阻球迷共同創造歷史嘅步伐！今屆明星賽移師NFL牛仔隊主場舉行，結果有108,713人入場欣賞，打破籃球賽史上最多入場人數紀錄，同時亦創下牛仔體育場新高，此數字亦順理成章躋身健力士世界紀錄大全！

由小牛班主古班一手促成，NFL牛仔隊老闆謝利鍾斯配合，在NFL美式足球場舉辦籃球明星賽，終告夢想成真並且圓滿結束。根據現場統計，今屆入場人數為108,713人，打破歷史上任何籃球賽嘅入場紀錄，上個入座率最高嘅籃球賽係○三年在底特律舉行嘅肯塔基對密茲根，當時人數為78,129人。而今次亦刷新牛仔體育場嘅入場新高，上次紀錄為105,121人。

達拉斯牛仔運動場坐咗十萬八千幾人，創下籃球賽嘅入場世界紀錄。 （美聯社圖片）

因傷缺陣嘅高比（左），喺場邊同西岸兼湖人隊友加素大講波經。（美聯社圖片）

「山頂」睇波氣氛減

其實賽前未有太多人睇好人數會衝破十萬大關，皆因多名星級戰將如高比仔及艾佛遜都提早退賽，加上德州又受風雪影響，難怪太陽後衞拿殊都話：「我相信好多人都估計只有七萬五至八萬人入場，但結果竟然突破十萬，今次係一個非常特別嘅經驗！」

雖然人數創新高，但質量就未必提高！因今次場地較為空曠，所以球迷所發出嘅歡呼聲，並冇普通球場般「應聲」，加上坐「山頂」嘅球迷大多只能靠大電視去欣賞比賽，自然難以投入，所以氣氛反而較遜。

東岸嘅皮雅斯帶埋囡囡參賽，溫馨滿載。（美聯社圖片）

穆連（左起）、柏賓同伊榮，三個名人堂最新候選人，喺魔術莊遜（右）陪同下向fans問好。（美聯社圖片）

■本報綜合報道