本文重點
【本報綜合報道】艾殊利高爾「情慾短訊」事件爆發第二波，英國《太陽報》踢爆呢位車路士左閘係大話精，指佢日前唔認曾與性感Model索妮婭互相傳送裸照，但其實佢早於九個月前，佢就試過瘋狂傳送超過三百個情慾短訊同鹹相畀另一名女子。換言之，A高根本一直背妻溝女，仲喺度扮晒無辜，可謂極之冇品。
300短訊+7張鹹相
艾殊利高爾日前自稱用手機自拍裸照後，將手機送咗畀朋友，結果有人冒充佢傳送照片畀索妮婭，但一位唔願意公開身份嘅金髮女郎對於A高擘大眼講大話實在睇唔過眼，向英國《太陽報》爆料，話自己喺九個月前總共收到A高超過三百個情慾短訊另加七張鹹相，當中仲有一張係A高勃起後自拍，非常惡心，並要求女方回贈裸照。
據悉，A高係趁老婆Cheryl出外拍攝電視節目兩個月期間，喪玩「情慾短訊」，佢接連被踢爆偷食後，Cheryl已經嬲爆，婚姻開始出現危機，Cheryl嘅媽媽及所屬女子音樂組合Girls Aloud成員都支持Cheryl飛甩A高。呢位英格蘭國腳最近受重傷，又捲入桃色醜聞，似乎正行緊墮落之路。