湖人領袖高比拜仁剛於日前打破名宿謝利韋斯紀錄，成為球隊史上「得分王」，所以「紫金兵團」尋日對山貓賽前，就由謝利韋斯親手頒贈紀念籃球畀高比，褒揚其成就。可惜高比仔領獎後竟大失準，全場手感極差，12射2中僅入5分，創下今季命中率及得分新低，高比仔對上一次得分低於5分，已經係五年前嘅事。
湖人兩分險勝山貓
幸好湖人仍以99比97險勝山貓，而教練積遜亦因此在湖人累積了534場勝仗，超越萊利成為湖人史上最多勝仗教練，現時「禪師」已經保持咗兩支球隊最高勝仗紀錄，此前佢教公牛贏過545場勝仗。另方面，NBA總裁史端已補選比立斯代替受傷嘅基斯保羅出席明星賽。
