本文重點
今季成績進步嘅密爾沃基公鹿，目標當然係繼○六年後再度打入季後賽，可惜主將米高列特早前重創收咧，為補其空缺，公鹿已決定簽入失業半年嘅前小牛後衞史達侯斯，希望佢同真寧斯可以擦出火花。
九五年新秀探花史達侯斯曾與高比拜仁及勒邦占士一樣，被傳媒譽為「波神接班人」，因為佢同米高佐敦一樣來自北卡羅萊納大學兼同樣六呎六吋高。
馬貝利或登陸CBA
不過，因為年紀漸大又飽受傷患困擾，史達侯斯上季僅為小牛上陣十場，季尾被送到孟菲斯灰熊後，亦被後者買斷其合約成為自由身。史達侯斯自七月被放棄後，已半年未有正式比賽，狀態成疑。
其實未加盟公鹿前，史達侯斯一直盛傳會登陸CBA加盟山西中宇，但現時後者正追逐另一前NBA球員「獨狼」馬貝利，因山西上季曾簽入前NBA球員韋爾斯，所以成事機會頗高。