「西北區一哥」金塊近況的確唔差，單係一月已經擊敗過克利夫蘭騎士及奧蘭多魔術兩支奪標熱門，而月初亦曾作客擊敗爵士。今場安東尼續有好表現，整場比賽22投13中，投射命中率接近六成，結果轟入37分及搶得8個籃板球，爵士主力基里蘭高明顯未能睇住呢位射手。至於比立斯同樣有料到，全場貢獻29分，佢今場最大功勞就係不斷博對手犯規，個人19次射罰球中17球，激死爵士教練史龍。

史龍怨爵士犯規太多

史龍賽後表示：「當你作客嘅時候，竟然讓對手獲得49次罰球機會，仲邊有機會取勝！」事實上金塊今場亦係靠罰球食胡，49次射罰球中41球，佔總得分嘅三分一。安東尼賽後就大讚今場復出嘅新秀羅臣：「羅臣復出可與比立斯組成雙控衞戰術，因兩人都有突破能力，間接幫助我和連尼獲得更多空位得分。」而比立斯亦指出，雙控衞於進攻時可作更多突破，避免出現太多浪射情況。

金塊贏波後總成績為26勝14負，現時與達拉斯小牛並列西岸第二位；而主將安東尼則力壓「大帝」勒邦占士，以平均得分30分，於得分榜居首。

■本報綜合報道