魯域斯基全面回勇

火箭喺兩名主將麥基迪及姚明缺陣下，改打小球戰術，以控衞布魯克斯為重心，實行以快打慢，但上次對住「小球宗師」小牛，呢招完全唔Work，因為小牛嘅「小球戰術」係由內至外，打法立體好多，回復MVP身手嘅「德國槍」魯域斯基喺內線「屈機」，傑特、泰利兩名控衞輪流發動攻勢，亦令布魯克斯招架唔住，上場埋單只係輸十八分，其實已經算少。

事實上，火箭經過季初一輪衝鋒陷陣之後，近況明顯回落，近十場都出現單跳情況，贏一場輸一場，狀態非常不穩，上場贏完帝王之後，睇怕今場又輪到輸波。

火箭過氣主將麥基迪康復情況較預期中理想，最近已開始簡單操練，但T-Mac同教練阿杜文一直唔妥，更有傳聞指火箭根本唔想佢歸隊，甚至會將佢交易到紐約人。一代名將若淪為人球，都可算唏噓。