一九八四至八五年賽季，當年新人米高佐敦為公牛平均交出28.2分、6.5個籃板及5.9次助攻嘅驚人數據，此後一直未有新人能夠超越「波神」嘅新秀賽季成績，就連「大帝」新秀年都只係交出20.9分、5.5個籃板及5.9次助攻，論氣燄同「波神」仲差一截。

放洋意國三分有成

不過，真寧斯今季嘅表現就可以拍得住「波神」，平均拿到24.2分、4.3個籃板及5.7次助攻，而佢較佐敦勝一籌嘅係三分命中率，達到47.5%，高踞NBA前列位置，難怪佢早已被譽為係今季最佳新人熱門。其實真寧斯之所以打得咁好，除咗有天賦條件之外，亦要多得上年在意大利聯賽浸淫了一季，苦練歐洲球壇特別重視嘅遠程投射，裝備好自己今季回流NBA自然事半功倍。