本文重點
【本報綜合報道】經過接近一星期嘅討價還價後，塞爾特人後衞朗度終於動筆續約，呢位廿三歲控衞獲得一紙五年5,500萬美元合同，總算如願獲得千萬年薪。有好消息支持，塞爾特人落場亦特別勇猛，尋日輕描淡寫贏黃蜂97比87，開咧四連勝。
皮雅斯着火射死黃蜂
因續約談判時限即將截止，所以塞爾特人亦趕忙與朗度傾續約條件，因朗度經理人希望新合約與其他大牌控衞睇齊，即至少索價過千萬美元年薪，所以兩者一直在討價還價。眼見朗度企硬，球會GM安治最後決定提供一紙五年5,500萬美元嘅合同給朗度，總算解決今次糾紛。而朗度下季年薪將與馬刺嘅柏加同一級數，後者6年合約袋6,600萬美元。
不過塞爾特人尋日對住黃蜂，最威嗰個唔係朗度喎，而係射手皮雅斯，佢今場14射10中，其中包括3個三分球，結果攻入全場最高27分，助塞爾特人贏97比87。至於其餘「巨頭」加納特、雷阿倫及拉舒華萊士都獲得雙位得分數字，可見塞爾特人進攻點非常平均，令對手防不勝防。