湖人上場意外地喺主場大敗於小牛手上，由於中鋒加素仍未傷愈，所以湖人為挽回頹勢，高比拜仁立刻挺身而出飆分爭勝。呢位總決賽MVP今場起手次數達到29次之多，當中15球命中，而罰球亦11投10中，結果個人獨取41分打出水準之作。湖人今場贏波關鍵係第三節施展嘅壓迫戰術，令鷹隊一時間陣腳大亂，當時湖人打出一段18比0嘅攻勢，將比分差距大幅拉開，最終湖人贏118比110，獲得今季第二場勝仗。

高比拜仁個人轟入41分之餘，同時亦交出8個籃板球及5次搶截，表現非常全面。年輕中鋒拜林今仗表現不俗攻入21分，而備受抨擊嘅阿堤斯則落足心機做好防守，全場貢獻12分、7個籃板球及3次封阻。

金塊開季三連勝

至於湖人勁敵金塊尋日同樣贏波，球隊憑藉着晒火嘅安東尼豪奪42分、7個籃板球及5次助攻，以133比123氣走作客嘅灰熊，助金塊開咧三連勝，亦係球隊自85/86年度球季後，首次獲此開局成績。安東尼頭三場嘅得分數字分別係30分、41分及42分，狀態好到不得了，難怪美傳媒盛讚安東尼終於達到占士及高比等級數，有足夠實力爭奪個人首座MVP獎項。

本報綜合報道