今季被譽為最有潛力彈起嘅拓荒者，似乎仲差一點經驗，尋日主場迎戰另一西岸勁敵金塊，因「水貨狀元」奧登尾段緊張過度，兩罰不中導致錯失反勝機會，結果在大部分時間領先下，拓荒者最終仍以94比97不敵對手。不過拓荒者板櫈深度雄厚，聽朝作客鬥有「姚麥」長抖嘅火箭，贏面仍高。（now 670周日早上8時30分直播）

拓荒者同金塊都係近年冒起較快嘅球隊，全因兩者皆不乏具潛質嘅年輕球員，尤其係拓荒者，主力萊爾、艾迪列治及奧登都只係二十出頭，前途無限，只可惜球隊仍差一點經驗。尋日主場面對金塊時，下半場大部分時間都處於領先狀態，賽事剩餘七分鐘時更一度領先七分之多，不過因奧登及佩斯比拿受個犯困擾，埋下輸波伏線。

金塊尾段只打一種戰術，就係搵弗到漏嘅安東尼狂爆對手，因拓荒者多次錯誤地運用較矮嘅萊爾防守「甜瓜」，結果讓後者連番得分，成為輸波最大因素。賽事餘下四秒時，本應拓荒者有一次反勝良機，當時主隊落後一分但奧登獲得兩罰機會，只可惜佢緊張過度兩罰皆炒，最終金塊以97比94贏波，開咧兩連勝。

聽日再搵火箭出氣

安東尼繼開鑼戰攻入30分後，今場亦轟入全場最高41分，狀態「托弗」，至於老大哥比立斯則有22分進帳。拓荒者表現最好依然係射手萊爾，全場攻入30分，而後備上陣嘅費南迪斯亦貢獻22分。拓荒者聽朝就會再對火箭，球隊開鑼日於主場輕鬆贏對手九分，基於火箭缺少「姚麥」下已實力大減，估計拓荒者作客都照樣贏波。