阿聯會鐵定留隊至二○一一年，而佢下年嘅年薪將達到四百○五萬美元（約三千一百萬港元），以一個三年生嚟講，薪酬算不俗。

易建聯當年被前球隊公鹿揀中時，與球隊簽下一張「2+2」嘅合約，即係兩年固定，其後可選擇跳出合同。呢張約亦跟埋阿聯過檔籃網，即係話三年生阿聯隨時都可以離隊。不過籃網當然唔畀阿聯走人，球隊放走卡特後已銳意重組，所以有潛質嘅年輕球員對其未來非常重要，球會剛宣布與三名二十出頭嘅球員布克盧比斯、哥特尼李爾及易建聯續約，可想而知阿聯絕對在籃網重建計劃之中。

奧尼爾交表「當差」

另方面，「巨無霸」奧尼爾已向俄亥俄州凱霍加縣治安官提交申請，成為該治安官嘅特別代表警察。其實奧尼爾一直以嚟鍾情「當差」，佢先後當過洛杉磯港口預備警察、邁阿密海灘警局預備警察及亞利桑那州預備警察。