効力洛杉磯快艇嘅新科狀元格芬近日磨拳擦掌，諗住喺新球季幹一番事業，點知球季開鑼前左腳膝部卻遭受重創，預計最少要抖六星期，快艇冇咗佢鎮守內線，有如中門大開，睇嚟季初只能任人魚肉。
缺席20場常規賽
格芬喺季前賽已迅速入局，平均每場為快艇攞13分及8.1個籃板球，成為快艇內線嘅得分及防守主力，點知佢喺最後一場季前賽對黃蜂時，因大力入樽而整傷膝頭，預計至少會錯過季初二十場常規賽。
其實快艇都算黑仔，因為佢哋近年挑選親嘅新秀，首個球季都頭頭碰着黑，八八年曼寧曾因十字韌帶撕裂而差啲令職業生涯告終，而○四年新人利雲斯頓亦甩臼，希望今次格芬可以早啲好番啦！