人緣差 海報遭刑毀
C朗於巴拿貝球場嘅亮相派對吸引八萬人入場，破埋馬納當拿紀錄，風頭勁到飛起，不過佢亦有自知之明，曾經講過：「我唔會奢求個個都鍾意我！」果然，唔好話其他西甲球隊，小記喺馬德里市都見到有好多人唔鍾意C朗。
話說一間體育用品公司，喺地鐵用C朗剝晒波衫嘅肉照大賣廣告，包括大型海報同燈箱全部都係C朗個樣。
不過，小記發現有多個車站嘅大型海報同燈箱，都被人吐口水，喺西班牙吐口水係極度侮辱嘅行為，可見某啲人真係好憎C朗。
拿，你可以話咁啱有痰想吐，未必真係唔鍾意C朗，但小記喺呢個車站，直情見到張海報被人撕爛，相信唔係唔覺意喇啩？C朗球技無疑係好好，但當馬德里都有人咁憎你嘅時候，係咪要檢討吓自己場外嘅表現呢？
人氣勁 雜誌封面王
C朗話題多籮籮，除咗足球場上，花邊新聞亦成為馬德里女士茶餘飯後嘅談論焦點，由傳出加盟第一日，人都未到馬德里，八卦雜誌已經搵定佢做話題，例如C朗衣着大回顧、十大想結識C朗模特兒、C朗西班牙蒲點，總之個個星期都搵佢做封面就必然大賣。
最抵死嘅係，有啲雜誌驚死執輸，仲掛羊頭、賣狗肉，搵張C朗相做封面，揭來揭去，先至搵到原來雜誌入面得一段仔C朗消息，擺明搵笨，不過，亦都證明佢真係好受歡迎，係賣書保證。
除咗報紙雜誌，小記去到巴拿貝球場同埋馬德里市中心兩間專門店時，見到唔少人都係排隊印C朗名同號碼，粗略估計，十個人當中，有八個都係印C朗，仲差唔多一分鐘印三件，受歡迎程度可見一斑。
制衡Ｃ朗 靠晒卡卡
Ｃ朗受歡迎，但一樣有暗湧，始終太過囂張嘅性格缺陷，對皇馬唔係一件好事，所以皇馬亦蠢唔晒，其實喺好多地方都刻意將卡卡抬高，唔畀Ｃ朗獨大。
喺馬德里市中心嘅皇馬專門店，一入門口，就會見到好多皇馬相片，包括一啲攞歐聯嘅靚相同表列咗威水史，而喺門口旁邊，就見一大張卡卡海報，Ｃ朗呢？未見喎。
至於喺巴拿貝球場入面，有一個影合成紀念照嘅counter，有三個球星可以畀你揀同佢「合照」，包括魯爾、卡斯拿斯同卡卡，又係冇Ｃ朗。明顯嚟講，球會要抬高卡卡、矮化Ｃ朗，喺一間商業掛帥嘅球會嚟講絕對係明智之舉，如果收入來源太過集中喺一個球星身上，對球會長遠利益絕對唔係好事。
周兆年西班牙直擊