易上手又有難度咁先激
風箏滑水的歷史並非太悠久，但卻是目前世界上玩家數目增長最快的水上運動之一，很多世界級選手駕着風箏及踏上滑板，遇着有風同浪真係可以「玩到飛起」，就是這股魅力讓每一個試玩的人都想再encore。
本身專項打籃球的阿Kate及Fontaine，每逢夏天都會約埋三五知己去滑水同玩水上電單車，但今次介紹的風箏滑水卻是第一次接觸，阿Kate話：「我以前真係聽都未聽過，但玩過後覺得好刺激，特別係控制隻大風箏，同放紙鳶係兩回事，要用晒全身嘅力，我差啲被佢拉上天。」不過，阿Kate練兩三次就已經似模似樣。
初學者安全措施要做好
Fontaine原本以為這個新玩意與滑水差不多，但試後當然感覺唔一樣：「我覺得滑水容易好多，因為有快艇帶住，只要平衡到就ＯＫ，但Kiteboarding最關鍵就係要控制隻風箏，然後又要上板，難度大好多。」其實，對初學者來說，風箏滑水不是太困難，只要接受一些基本訓練，很快就能掌握騰空到六米高的技巧，再經過幾星期的練習，大多數人都能達到十幾米高。
當然每項運動都有一定的危險，Fontaine都覺得Kiteboarding幾危險：「風箏嘅拉力真係好大，如果操控得唔好可能會被拖到危險嘅地方，聽教練講風箏線都好鋒利，一定要好小心。不過，我知道佢哋嘅安全措施都非常充足，安全掣都有兩個，而且初學者要佩戴頭盔同着救生衣，都可以放心嘅。」Kiteboarding這項運動已熱爆歐美，於亞洲亦積極推廣，十二月更會在香港舉行其中一站亞洲巡迴賽添。
有乜裝備先？
話明風箏滑水，當然要有齊玩滑水同放風箏嘅器材啦！
滑板：驟眼睇塊滑板同平時玩滑水嗰啲冇乜分別，但其實浮力較高，可分為單向及雙向板兩種。
風箏：除咗要夠大，亦要夠輕「升空」，更要喺跌落水面時識浮唔會沉，所以呢種特別嘅風箏具有充氣支架，以往用兩線或四線操作，依家更有以一條中心線改良的四線風箏。
風箏線：一般長27米嘅防水高強度繩索，可以承受高於500磅嘅拉力。
把手：把手長度同風箏大細成正比，通常會以鋁合金或碳纖維製造。把手上亦有調整及緊急釋放裝置，方便控制力量及在最短時間將風箏拉力釋放。
腰帶：可分為分坐式及腰式兩種，前者較易使用，後者則較適合用作玩花式。
吳婉琪（Kate）
年齡：20歲
身高：1米69 體重：53公斤
學歷：香港公開大學文憑課程
興趣：運動、約朋友
依家最想……：都係想學語言，學緊日文，但想學埋德文同西班牙文
陳鈁渟（Fontaine）
年齡：21歲
身高：1米60 體重：50公斤
就讀學校：香港城巿大學巿場營銷學系 （Year 2）
興趣：籃球、唱歌、跳舞
依家最想……：學多幾種語言，例如法文
圖、文：李芷韻、司徒子文、阿Myu