本文重點
姚明到騎士輔助「大帝」已非癡人說夢話！「小巨人」現時已返回中國度假，佢接受上海電視台訪問時，竟以「未知數」嚟回應過檔克利夫蘭騎士傳聞，足證呢位中鋒有意跳草裙舞。不過，亦有專家估計姚明此舉只係逼休斯敦火箭盡快同佢續約，據悉「小巨人」有望獲得六年一億三千三百萬美元（約十億三千七百萬港元）頂薪合同。
自從黃健華入主騎士後，佢一而再表示想拉攏「小巨人」到克利夫蘭，與占士組成超強組合。因姚明與火箭嘅合約於二○一一年到期，所以佢下年就可以選擇跳出合同，成為自由身加盟其他球隊，而目的地大有機會係克利夫蘭。
逼火箭盡快續約
姚明剛接受上海電視台訪問時，就回應去向傳聞：「無論他（黃健華）是華人還是外國人，他們的共通點都是老闆，會否過檔仍是未知數。」
今次姚明並冇明確否認轉會傳聞，可見佢心態上已有所轉變，始終騎士奪冠機會較火箭高，姚明下年離隊絕不出奇。不過，有指姚明態度有變全因要逼火箭以高薪挽留，姚明出現離心後，火箭已決定以頂薪六年一億三千三百萬美元同佢續約，與其他高薪球星睇齊。
至於另一位中國球員孫悅，同樣要為前途費心，皆因佢已回到北京，遵守對中國籃協嘅承諾參加八月嘅亞錦賽。但亦因為咁，孫悅將無法參與NBA季前賽事，據悉湖人已向佢表明，缺席季前賽會大大影響其NBA前途，大有機會因此被湖人放棄。