本文重點
廿四歲的「黑帝」咸美頓兩年多前與性感女歌星Nicole Scherzinger在慕尼黑嘅歐洲MTV頒獎禮撻着後，雖然女方年齡大近六年，不過憑住超性感外形同老練嘅冧仔招數，成功降伏「黑帝」，發展一段愛得轟烈嘅姊弟戀。
Nicole綁實好仔
喺愛情滋潤下，咸美頓上季勁爆為麥拿侖贏得總冠軍車手，兼破埋舒麥加嘅史上最年輕世界冠軍紀錄，到巴西壓軸一站後他「登基」，全家人總動員慶祝，Nicole與「未來老爺」攬頭攬頸，儼如一家人，之後傳出她與咸美頓結婚嘅消息，兩口子笑咪咪話未係時候，不過已視對方為理想對象。
剛入選《福布斯》體壇富豪榜第13位，年賺2.49億港元嘅咸美頓，名副其實係鑽石王老五，加上形象健康，對家人極之好，係好仔一名，所以Nicole「咬住唔放」，即使今季麥拿侖戰車唔夠砌，令「黑帝」戰績下滑，目前僅排十一，Nicole依然有情有義，依然力撐男友。
去年咸美頓喺英國站雨戰中封王，威震全國，且看他周日能否「反彈」，成為銀石賽道嘅「末代王者」。