本文重點
尋日最令魔術痛心，肯定係第一季打NBA就入到總決賽嘅哥特尼李爾，佢第四節絕殺一擊唔入，最終令魔術輸到○比二！不過，呢球波賽後都大受爭議，皆因當時補位Mark佢嘅加素，封阻時手部穿過及觸碰到籃框，根據球例應該判違規干擾，入球有效，可惜千鈞一髮之間連球證都睇唔到。
球證「漏眼」湖人好彩
從慢鏡及照片顯示，當李爾出手後，湖人中鋒加素的而且確手部觸碰到籃框，因球例訂明當球在籃框上時，球員係唔可以觸碰籃框，若違規就會被判干擾入球，魔術可得兩分。若球證當時有吹罰嘅話，現時總比數已經係一比一。
高比拜仁賽後談起亦猶有餘悸：「李爾實在非常聰明，佢知道我會盯住外圍射手，所以突然跑入籃底接應並成功起手，呢球絕對策劃得好巧妙，可算係一個非常恐怖嘅攻勢。」雖然呢球波唔入，但整個部署配合得天衣無縫，所以教練雲根迪絕對應記一功。