經過一場大敗後，魔術今回痛定思痛，着重番防守，所以兩軍開賽後都表現保守，比分亦偏低，上半場過後湖人領先40比35，而下半場開賽後，魔術發揮較佳，喺第三節追回不少分數。第四節兩軍分數一直咬住上，賽事剩餘9秒時打成88平手，湖人將最後一擊交畀高比仔，可惜佢跳射被陶告魯封阻並搶得籃板，讓魔術有0.6秒施展絕殺攻勢。結果哥特尼李爾巧妙地甩開高比仔接球上籃，可惜彈框唔中。

歷史顯示94.2％機會捧盃

執番身彩嘅湖人喺加時發威，加素五分鐘內攻入七分，加上魔術連番失誤，最終湖人以101比96贏波，驚濤駭浪保住主場勝仗。雖然高比仔今場略為跌Watt，但佢仍貢獻全隊最高嘅29分及8次助攻，可惜亦有7次失誤。至於拍檔加素就有24分及10個籃板球進帳，成為贏波重要功臣。魔術方面，杜域侯活繼續交出驚人數據，全場17分、16個籃板球、4次封阻及4次偷波，而劉易斯則攻入全場最高34分，其中有6球係來自三分球。

根據NBA總決賽歷史，只要球隊喺七場四勝制下，主場領先二比○嘅話，捧盃機會達到94.2%，所以湖人奪得今季總冠軍可謂高唱入雲！歷史上只有三隊主場領先二比○下失落錦標，對上一次就係○六年小牛。兩軍明早再戰，魔術主場爭奪史上首場總決賽勝仗。（有線165台、now 670、高清翡翠台及廣東體育周三早上9時直播）