本文重點
萬眾期待嘅「夢幻決賽」占士Vs高比，似乎要等下年啦！騎士始終都改唔到太倚賴「大帝」勒邦占士嘅壞習慣，正所謂一人難敵四手，更何況魔術十隻手都咁射得，縱然占士第四戰轟入44分之多，但關鍵時刻卻屢次TO（失誤），騎士最終喺加時後以114比116不敵魔術。魔術總成績領先三比一，只要明早作客再贏一仗，就可以自九四至九五年度球季以來，十四年後再度打入總決賽！（有線體育台62及有線165台周五早上8時30分直播）
大帝殘晒頻頻失誤
如果騎士班球員識得聽廣東話嘅話，阿Bob一定會介紹古巨基首《重複犯錯》畀呢班友仔聽，整個東岸決賽，騎士四場都喺下半場出事，第三及第四節例牌跌Watt，成為落後一比三嘅主要原因。今場騎士上半場亦領先58比50，但下半場被對方逆轉，縱然僥倖逼到加時亦無補於事，最終以114比116不敵後勁凌厲嘅魔術。
騎士例衰收尾，全因一眾球員冇信心，好似尋日咁，末節將所有攻勢都集中喺占士身上，但就算「大帝」幾勁都好，魔術都唔係紙紮吖嘛，咁單調嘅進攻模式，間接令魔術易於防範。結果疲累不堪嘅占士尾段不斷TO，包括第四節最後短短四分鐘內，占士三次失誤，去到加時更加錯漏百出，交失波、被封阻乜都齊，當中最關鍵就係剩餘1分25秒時，占士一次組織被艾斯頓搶截成功，令騎士被拋開六分距離，縱然占士最後亦有一次絕殺機會，可惜途程太遠難再創奇迹。
無疑「大帝」喺個人數據上繼續「贏晒」，44分12個籃板球及7次助攻，但佢全場8次TO，亦絕對難辭其咎！魔術控衞艾斯頓今場貢獻26分，入咗6個三分波，而杜域侯活就攻入全隊最高27分。