西岸決賽第四回合明早上演，雖然金塊落後場數一比二，但佢哋將繼續喺「魔鬼主場」對付湖人，追平並非難事。再者，呢班嘩鬼夠晒激情，衰衰格格嘅款亦深得球迷歡心，難怪會被譽為新一代「壞孩子軍團」！不過，查實佢哋仲惡過八十年代班活塞Bad Boys，因為佢哋真係壞事做盡！（now 670周二早上９時直播）
壞蛋首領 安東尼
身為壞蛋軍團首領，「甜瓜」安東尼當然有唔少「戰績」，早於○四年，佢就喺機場被警方搜出手提包內藏有大麻，但當時因為佢朋友幫佢頂罪，結果「甜瓜」無罪釋放。不過，因為呢單嘢而曾經流出過一隻威脅殺害告密者嘅DVD，安東尼正正出現喺畫面內，可見邊個得罪佢都冇好下場。○六年警方再一次喺「甜瓜」車內搜出大麻，但最終都係告佢唔入，上年佢就衰醉駕被捕，一句講晒，唔係好人。
炒車之王 JR史密夫
JR史密夫出名係金塊「車神」，不過係撞車嗰隻，呢位仁兄前年試過揸車炒落隊友安東尼架車度，其後仲因為一次炒車，累死咗坐佢車尾嘅一位朋友，認真攞命。唔單止咁，JR史密夫曾經喺八個月內五度違反交通規則被罰，大多數都係超速，另外仲試過三次被勒令停牌，佢手車夠晒恐怖。
迷幻鳥人 基斯安達臣
「好毒」嘅又點只「甜瓜」一個，「鳥人」基斯安達臣除咗成身「公仔」之外，仲以毒聞名於世。○六年驗尿時，佢被驗出吸毒，隨即被NBA重罰禁賽兩年，結果要到今季先正式復出。
口臭惡爺 簡安馬田
簡安馬田向來都冇乜朋友，皆因佢得罪人多稱呼人少，把口仲臭過部垃圾車！當佢仲喺籃網嘅時候，就曾經因為笑莫寧「腎虧」，搞到莫寧差啲打佢一身！唔知佢係咪笑得人多，有球員就見過馬田出現痙攣症狀，風水輪流轉到佢畀人笑番夠本。
金塊仁哥 安東尼卡特
安東尼卡特本來都係一個好人，可惜佢同《無間道》嘅陳永仁一樣，全家族都有背景，話佢係好人都冇人信。卡特媽媽係一名毒販，而佢七個Uncle更加全部都犯過事入過冊，所以佢好細個已經要出嚟搵食，仲曾經幫過毒販打黑市波，被迫犯法。