本文重點
騎士尋日輸波，多多少少都因為佢哋季後賽太過順風順水，輕敵招致敗仗。基於首戰輸波，預期一眾球員聽日都會認真應戰，甚至更加肉緊去爭勝，睇嚟魔術都係頂唔住嘞！再者，今季騎士主場得勝率達到九成以上，今場反擊戰入波必多，捧大，另讓8.5分都要捧上盤！（無綫明珠台、有線165台、體育台62及廣東體育周六早上8時30分直播）
雖然勒邦占士首戰輕微扭傷大腿，右腰亦被抓傷出血，但估計呢啲小傷都影響唔到「大帝」爆發，皆因球隊唔可以再失主場優勢，占士係時候挺身而出。事實上，占士近況仍處巔峰，上場個人轟入49分，魔術根本冇人阻得住佢，只要其餘隊友如莫威廉士及韋斯啲三分命中率好番多少，要擊敗魔術可謂綽綽有餘。
主場得勝率逾九成
表面上騎士讓8.5分略嫌太多，但基於球隊剛嘗到首場季後賽敗仗，預期球員肯定搏老命挽回面子，希望大勝一場重振士氣，再者騎士擁九成以上主場得勝率，所以上盤仍然值博。此外，兩隊攻力都有一定保證，相信分數唔會細得去邊，上盤及總得分大都值得捧場。