「大帝」正式登基！勒邦占士首度奪得常規賽最有價值球員（MVP）！年僅廿四歲嘅占士，踏入NBA第六季終於登上頂峰，力壓兩位「夢八」隊友高比拜仁及韋迪，以1172分當選今季常規賽MVP。今次獲獎唔單只係「大帝」個人榮譽，更係騎士史上首次有球員奪得MVP，難怪整個俄亥俄州都為占士而瘋狂！
懸殊分差壓高比
今季常規賽MVP由全美及加拿大合共一百二十一名體育記者選出，首選票數10分、次選票數7分、第三位5分、第四位3分及第五位1分。結果勒邦占士拿下109張首選票數、11張次選票數及1張第三位票數，總分為1172分，懸殊分差壓倒第二位獲698分嘅高比拜仁，而「閃電俠」韋迪則以680分列第三。
今季「大帝」打出職業生涯最「瘋癲」一季，每場平均28.4分、7.2個籃板球、7.6次助攻及1.7次偷波，最重要係佢帶領騎士造出常規賽66勝16負，成為常規賽冠軍，奪獎絕對實至名歸。雖然「大帝」以廿四歲零一二五日當選為MVP，但佢並非最年輕得主，皆因摩西馬龍於三十年前以廿四歲零十六日獲獎，而安斯列特於六九年更以廿三歲之年齡成為MVP得主。
選擇返母校領獎
為咗迎接呢個歷史性時刻，「大帝」坐上心愛嘅黑色法拉利，選擇以母校聖瑪麗高中作為MVP領獎地點，皆因佢曾為聖瑪麗三奪州冠軍，而佢嘅23號球衣亦高掛喺場館之中，對占士意義重大。十七歲已登上國際著名雜誌《體育畫報》封面嘅占士，以天之驕子身份打拚NBA六季，終圓MVP之夢，「大帝」亦名正言順登基。