本文重點
【本報綜合報道】今季常規賽四次對賽都未贏過湖人嘅火箭，打出激動人心一戰！先有柏堤亞血染球場，繼而再有姚明撞傷膝蓋仍堅持上陣，最終鬥志旺盛嘅火箭以100比92作客爆冷擊敗「西岸一哥」湖人，估唔到十二年來首場季後賽次圈賽事就敲響勝鼓。
小巨人傷都砌到底
無論實力、往績及休息時間都佔盡優勢嘅湖人，首戰主場出擊盛氣凌人，但放開懷抱嘅火箭打出超水準，開賽後一直領先主隊，首節完結前，柏堤亞一次搶籃板被湖人嘅胡查錫打爆左眼角，即時血流披面，但亦因為咁，火箭球員反而更投入比賽。
三節過後，兩軍分數一直咬住上，去到第四節剩餘4分54秒時，姚明喺籃底欲阻止高比拜仁上籃，但高比仔卻撞向「小巨人」膝蓋，姚明隨即痛苦萬分，並要軍醫攙扶到更衣室。不過姚明到更衣室途中卻突然掉頭，堅持要打埋今場先治療，隨即令火箭士氣大振，最終火箭保持勝局，以100比92擊敗湖人。
姚明打出今季季後賽代表作，攻入「雙雙」28分及10個籃板球，而阿堤斯繼續有上乘表現，攻入21分及7次助攻。至於湖人雖有高比拜仁攻入32分及8個籃板球，但未能單天保至尊。