本文重點
要數近年最易估嘅常規賽ＭＶＰ得主，非今季嘅占士莫屬，「大帝」由季前勇奪京奧金牌之後，恃勇喺常規賽屢破紀錄，數據已足以令佢登上ＭＶＰ寶座，即刻同大家回顧一下。
最年輕破萬一、萬二分球員
今季占士帶領騎士奪得66勝16負，足足較上季贏多21場勝仗，此外主場39勝２負，得勝率更得人驚。占士今季兩度打破得分紀錄，首先以廿三歲零三二四日，成為ＮＢＡ史上最年輕球員突破11,000分，其後再以廿四歲零卅五日，刷新ＮＢＡ史上最年輕球員突破12,000分紀錄。此外，占士亦以廿三歲零三○八日，成為最年輕及最快（共395場賽事）奪得10,000分、2,500個籃板球、2,500次助攻、700個偷波及300個封阻嘅球員。
年紀輕輕屢破紀錄，難怪占士奪獎後表示：「我只得廿四歲，從未想過可以咁快獲此殊榮，但若果我話我唔想攞獎，絕對係呃你，努力過後如今終夢想成真！」不過占士仍未敢開心太早，皆因佢仲有任務未完成：「我仲有好多事未完成，我希望到六月（季後賽煞科），可以再慶祝一次！」