湖人顯示強大實力，季後賽首回合對爵士，談笑用兵之下，輕鬆以一一三比一○○贏波，主將高比拜仁及教練積遜都創歷史。教練同球員都咁弗，聽朝主場第二擊，應可順利擴大領先優勢。（廣東體育周三早上10時30分直播）
今季湖人被視為總冠軍大熱門，球隊亦以這個目標努力，所以季後賽首幾輪，湖人都希望速戰速決，今仗對爵士這個策略絕對是戰術奏效。第一節已經領先三十比十九，到第二節更將領先比數拉開到六十二比四十，由於比數早早拉開，下半場積遜教練畀部分主力休息，最終湖人hea住打都贏一一三比一○○。
高比得分超前魔術手
高比仔唔使出好多力，今場只係射入廿四分，明顯是保住體力，但仍然累積季後賽得分達3,710分，壓過「Magic」魔術手莊遜成為季後賽歷史得分榜的第九位。至於積遜教練更威水，執教過的公牛及湖人，於季後賽系列賽首戰保持四十二場全勝紀錄，於湖人累積至十八場。
姚明火箭再襲拓荒者
聽朝呢個系列又再對碰，相信湖人絕對唔會放生爵士，避免「老八傳奇」誕生，積遜一定叫球員盡早收拾對手，贏波絕對唔成問題。
除了湖人，西岸聽日有另一戰役，火箭進行第二回合狙擊拓荒者。從首回合所見，拓荒者不論係韋斯達定係奧登，都頂唔住「小巨人」姚明。姚明打波習慣好開就好，相信未來幾場他在這個match up會好有優勢。