尋日東岸兩場賽事都出現意外賽果，魔術主場雖然有「老虎」活士撐場，但爆冷不敵76人，伊古達拿最後兩秒絕殺搞掂魔術，助76人以一○○比九十八作客贏波。
於常規賽一度有機會成為東岸一哥的魔術，季尾跌Watt，估唔到更累及季後賽，首戰主場對76人，連「老虎」活士都入場睇吓魔術點樣贏波，點知呢隊東岸「三哥」竟然以輸波招呼活士。
開波第一節魔術只落後廿五比廿七，球隊好快恢復過來，到第三節完結，魔術已經反領先76人七十九比六十五，以為勝利在望，點知球隊第四節又手軟，只射入十九分，被76人有機可乘，愈追愈近，更於比賽完結前兩秒，被伊古達拿得手，76人就以呢兩分擊敗魔術，主場球迷鴉雀無聲。
另一場鷹隊以九十比六十四擊敗熱火，兩軍手感都唔掂，下半場總得分及第四節總得分，都刷新NBA季後賽歷史新低紀錄，熱火主將韋迪被鷹隊封殺，這位常規賽得分王全場僅得十九分。