主場最強騎士冇得頂
勒邦占士登陸NBA六季後，終於「登基」坐上常規賽一哥寶座！今季騎士表現無懈可擊，總成績六十六勝十六負，遠遠超過隊史最佳五十七勝廿五負。除此之外，更較上季常規賽贏多廿一場勝仗，成績大躍進！騎士今季最大本錢就係主場威力，卅九勝二負，若非最後一仗係例行公事而輸咗，早就平咗NBA最佳主場成績紀錄。
進步神速拓荒者最驚喜
今季多支年輕力量都打出驚喜，其中佼佼者非拓荒者莫屬。拓荒者已連續五季缺席季後賽，但一眾年輕球員愈見成熟後，今季四平八穩，萊爾與艾迪列治進步神速，打出一線水平。此外，拓荒者嘅後備兵力亦非常犀利，西班牙好手費南迪斯及小前鋒歐羅都幫到手，值得一提係以上主力都唔超過廿四歲，球隊前途無限。
一變再變鳳凰城最大輸家
「一變再變」嘅鳳凰城太陽，係今季常規賽大輸家，球隊季初聘用放棄小球戰術嘅樸達，成為全季最大敗筆，最終賠上成績，四季後再度緣盡季後賽。雖然鳳凰城季中已改由根特利掌帥，可惜主將史杜迪米亞喺球隊略有起色後因眼傷提早收咧，大大削弱實力，三名老將拿殊、奧尼爾及格蘭希爾齊齊無緣季後賽，令人唏噓。
兩成勝率帝王最羞家
今季喺常規賽「包艇」嘅係帝王，成績僅得十七勝六十五負，得勝率兩成，創下近六季西岸最差成績。帝王今季較上季輸多廿一場比賽，成績低沉同金融海嘯都有關係，球隊為求縮皮，今季先後放走多名主力，好似沙蒙斯及畢米拿等，其後更放走從公牛換入嘅古頓，完全放棄今季賽事，落得一敗塗地。