活塞告急AI收檔3連敗

本文重點

東岸傳統勁旅活塞近期都算多事之秋,老將艾佛遜不甘當替補以背傷為由提早收咧,而球隊近績亦每況愈下,尋日活塞作客76人再輸九十比九十五,常規賽三連敗,再次跌落第八,隨時連季後賽席位都冇埋!至於76人贏波後,成為第六支鎖定季後賽席位嘅東岸球隊,現時位列第五。

向來都係NBA數一數二GM嘅杜馬士,今季都算係上任九年以嚟最冇眼光嘅一季,皆因佢季初賭博式以比立斯換入艾佛遜,前者幫金塊坐上西岸二哥之位,仲有望衝擊隊史最佳成績;但「AI」加入活塞後不進反退,依家仲因為唔願做後備而提早收咧,換入野性難馴嘅球員,杜馬士點都要負上多少責任。

依家活塞唯一目標,就係保住季後賽席位,可惜佢哋尋日又遭逢敗仗,艾佛遜無緣倒戈之下,76人憑末節強橫後勁,以九十五比九十成功逆轉贏波!今場「小AI」伊古達拿十九射十三中,結果全場攻入卅一分及取得九個籃板球,而老將安祖米拿帶傷上陣之下貢獻「三雙」,廿一分、十二次助攻及十個籃板球,同屬贏波功臣,助76人鎖定季後賽資格。

山貓後上有力

連輸三場嘅活塞,現時總成績為卅六勝四十負,因同日公牛以一○三比九十四擊敗籃網,取得近十一場賽事第八場勝仗,所以公牛又試壓過活塞,上番第七。連番輸波嘅活塞,現時僅領先第九位嘅山貓兩場波,以球隊嘅低沉狀態,畀冇壓力嘅山貓搶走季後賽席位亦唔奇。

阿Bob提提大家 ,香港時間周二早上冇NBA賽事,周三早上再戰。