本文重點
西岸「二哥」之爭逐步明朗化，尋日金塊面對大有機會係佢哋首圈對手嘅爵士，憑藉後備殺手JR史密夫瘋狂射入八個三分球，加上主將安東尼亦有廿三分進帳，最終金塊主場以一一四比一○四贏波，總成績達到五十勝！今次亦係金塊創會以嚟，首次連續兩季常規賽獲得五十勝，令人大跌眼鏡！
JR史密夫狂入三分球
正如金塊教練卡爾賽後所講，相信冇人會估到金塊今季會獲得五十勝，更加冇人估到佢哋可以喺強隊林立嘅西岸排第二。金塊今場繼續強攻對手，雖然正選射手丹迪鍾斯表現平平攞零分，但後備上場嘅JR史密夫卻把握上陣機會大爆發，三分球十三射八中，獨取廿八分，而佢亦交出七次助攻，成為全場亮點。至於隊友安東尼亦貢獻廿三分及九個籃板球，而基斯安達臣亦打破個人封阻紀錄，作出八次封阻，同屬金塊贏波功臣。
金塊贏埋今場後，常規賽五連勝，而總成績亦達到五十勝，係球會史上首度連續兩季獲得五十勝。現時金塊嘅常規賽賽事仲剩六場，如果佢哋可延續強勢，有望打破球隊喺八七至八八年球季造出嘅五十四勝四十八負常規賽最佳成績。金塊主帥卡爾賽後表示：「五十勝係一個安全線，我夠膽講冇人喺季前估到我哋攞到五十勝，包括我自己在內！」