本文重點
邊個可以登上東岸季後賽尾班車，似乎仲有排鬥！現時喺東岸排第九嘅山貓，尋日主場爽歎「私房菜」湖人，而同時排第七嘅活塞同排第八嘅公牛輸波，三隊依家相差勝仗得番兩場。究竟呢三隊邊兩隊可以攞到季後賽席位？仲有排鬥！
點解話湖人係山貓「私房菜」？因為呢支現時喺西岸排第一嘅勁旅，連埋今次在內，過去四季七次對碰當中，六次輸畀被認為係「魚腩部隊」嘅山貓。
活塞公牛輸波形勢緊湊
唔知係咪心理上有優勢，力爭出線季後賽嘅山貓，尋日對住湖人毫無懼色，六位球員得分達雙位數，最後更憑謝勒華萊士取得廿一分同十三個籃板球，加上成功箝制湖人絕對主力高比拜仁，主場爆冷贏湖人九十四比八十四。
因為同日活塞同公牛分別輸畀騎士同溜馬，令山貓依家只分別落後佢哋兩場及一場勝仗，絕對有機會後來居上，成功取得季後賽入場券。