政情：林卓廷腰圍瘦4吋 獄中太嘈難冥想
民主黨前副主席、前議員林卓廷因參與舊年民主派35+初選，涉違反《港區國安法》被控串謀顛覆國家政權罪，現仍在還押。佢日前就回覆來信，由黨友喺社交平台讀出信件，自爆瘦咗好多，腰圍都瘦咗成4吋。唔通喺獄中太辛苦？
林話有啲親友見到佢瘦咗感到唔開心，佢都承認自己腰圍瘦咗4吋，但話係因為食得清淡同埋做多咗運動嘅結果，叫大家唔好擔心，話會照顧好自己喎。
佢又話有市民會寫信畀佢，教佢拉筋同做運動，其中一個市民就教佢冥想。佢指當每晚囚室最安靜時，佢都會把握時間回信同埋睇書；而日間喺工作（期數）時有太多人，更形容江湖人士聲聲入耳，因為太嘈相信要定力夠高先可專心冥想喇！