政情：擬爭取性小眾權益 朱敏健預咗被鬧
性小眾議題近日再成社會熱話，平等機會委員會主席朱敏健尋日出席一個網台節目時透露，平機會最快喺今年撰寫文件，就性小眾個人權益等諮詢不同持份者。面對社會上保守聲音，朱明言自己預咗畀人鬧，只係最怕鬧完啲批評係無建設性喎。佢仲話，過去擔任其他公職亦遭各方立場人士指罵，笑言自己已經被人鬧慣咗！
會先寫諮詢文件
朱敏健坦言，要推動社會消除歧視好困難，但就唔可以乜都唔做，透露平機會今年會先撰寫諮詢文件，會同議員、家校團體、性小眾團體等會面，希望出年可以取得突破性進展。佢就覺得社會對性小眾個人權益議題爭議較少，所以會推動相關立法，以保障喺職場、學校以至使用公用設施時嘅權益。
朱又形容做平機會主席做得好開心，雖則自上任後一直被人鬧，但就重提早年出任監警會秘書長時，亦被各方立場人士鬧慣咗，甚至鬧到狗血淋頭。朱嘅任期喺出年4月屆滿，會唔會想做再做多屆？佢就話，到時就算邊個做主席都可以喎！