政情：獲薦終院常任法官 傳馬道立妻放棄
政府上月公布特首接納司法人員推薦委員會建議，推薦高等法院上訴法庭副庭長林文瀚，填補終審法院常任法官空缺。不過，據悉原獲推薦出任該職位者，係終審法院前首席法官馬道立妻子，即高等法院上訴法庭法官袁家寧。有外媒尋日引述消息報道，袁係喺建制派議員表達關注下，主動提出希望撤回有關任命推薦。有被指涉事嘅議員反駁，批評「建制干預法官任命」嘅指控係上綱上線！
外媒指建制施壓遭反駁
喺早前嘅立法會司法及法律事務委員會上，議員周浩鼎（Holden）、葛珮帆（EQ）對推薦人選提出關注，質疑袁家寧可能會受丈夫馬道立影響。Holden同EQ尋日回應報道時，認為難以知悉報道指袁主動要求撤回有關任命推薦嘅說法是否屬實，故難以評論，但就覺得唔應該誣指佢同EQ向司法機關施壓。EQ就質疑部分報道故意歪曲佢同Holden嘅意思，批評所謂「建制干預法官任命」嘅指控，純屬上綱上線嘅政治炒作。
而司法機構回應查詢時表示，唔會評論傳媒就司法人員任命事宜所作嘅猜測，又重申有關任命推薦符合相關法定要求。