拘押中慶生 林卓廷呻鍛煉辛苦到想死

收到數獨 因為太難放棄

林卓廷話喺過往一段時間收到唔少人寄信畀佢，其中一個人可能驚佢喺狹窄嘅牢房做運動會扭傷腰，於是畫咗圖，教佢點樣做動作，佢又透露之前每日放風嘅時候，就跟幾個「筋肉人」鍛煉體能，所以頭嗰幾日簡直辛苦到想死，但幾日過後就適應咗，仲話因為運動量大咗，食量自然增加，需要補充體力。

唔單止畫圖教做運動，佢仲聽到好多奇情怪異嘅事，例如有人寫信講畀佢聽撞鬼嘅經歷，又有人化身「謎語人」，啲謎語仲深過啲高官語言，完全估唔到，亦有人又寄咗「數獨」畀佢，佢話「數獨」實在太難，惟有放棄。

佢又引述電影嘅對白「千祈唔好慣」，但就話喺拘押期間必定要學習適應，否則只會令自己度日如年，佢仲話已完全適應咗被拘押嘅生活嘞！