政情：何君堯撤司法改革議案 留番東方專欄討論益讀者
香港司法亂象一籮籮，議員何君堯原本打算提出司法改革嘅議員議案，但日前宣布撤回。佢解釋原因，係自己逢星期一至五為《東方日報》（下稱「東方」）龍門陣寫專欄，討論司法改革。議會方面就討論其他議題。睇嚟有好嘢佢都係留番畀東方啊！其實喺銷量第一嘅東方寫專欄，淨係本港都有幾百萬讀者，未計海外華人，效力同立法會提議案不遑多讓啦。
改提爭取8‧15前通關
何君堯原定喺下周三（16日）嘅立法會會議上提出「司法改革」議員議案，佢提到自前年黑暴風波以嚟，社會對司法機構嘅表現抱怨甚深，包括批評司法效率低、程序亦有被濫用之嫌，導致案件積壓如山。另外，有部分嚴重罪行判刑過輕，予人黑箱作業嘅感覺。故此何敦促盡快進行司法改革，佢建議設立量刑委員會、廢除法官戴假髮嘅傳統，去除司法機構殖民地嘅標誌等。
至於何前日（10日）突然撤回議案，引起傳媒關注。何就解釋，因為佢喺東方寫開一系列有關司法改革嘅文章，於是佢決定留番機會，喺議會提出另一項巿民關注嘅議題，就係爭取喺8月15日前通關喇，仲打算同其他議員協調，畀佢率先提出議案添。