政情：何君堯斥司法一團糟 依賴五眼聯盟法官風險高

何君堯認為目前終院開庭須由4名常任法官加上一名非常任法官嘅規定係「自我設限」，質疑點解主要依賴「五眼聯盟」法官出任非常任法官，而唔考慮其他普通法地區嘅法官。佢批評香港向來信奉嘅西方國家喺反對修訂《逃犯條例》示威後包庇香港逃犯，形容係「反轉豬肚就係屎」，若再依賴「五眼聯盟」法官出任非常任法官恐會構成風險，認為政府喺憲制上要居安思危。佢又指曾經有法官公開批評《港區國安法》，故認為委任法官必須考慮政治問題，絕不能忌諱不談。

梁美芬倡邀請其他地區人士

本身係大律師嘅議員梁美芬亦話《基本法》容許邀請其他普通法地區嘅法官參與審判，而本港海外非常任法官主要來自英國，但係英國、澳洲等地嘅政客就經常公開給予當地司法人員政治壓力，所以建議增加來自其他普通法地區嘅法官，例如新加坡、馬來西亞等，又應增加本地非常任法官數目。

何熙怡被指藉辭職抹黑香港

身兼執業律師嘅議員周浩鼎就批評「五眼聯盟」過往喺各方面打壓中國同埋香港，而有部分海外法官早已作政治表態，認為喺聘請非常任法官時要先充分了解法官嘅背景，又批評何熙怡係透過辭職抹黑香港。佢強調司法人員唔應該捲入政治，或者配合當地政客嘅行動。

面對咁多批評，司法人員推薦委員會秘書梁悅賢回應話，引入海外非常任法官能吸納具專業司法經驗嘅人士，有助香港確立司法獨立及與其他普通法國家保持聯繁。佢指本港目前有4名本地非常任法官及13名海外非常任法官，當中9名來自英國、3名來自澳洲、一名來自加拿大，終審法院首席法官會按需要，邀請最適合嘅法官來港審議。佢又話按法例要求，海外非常任法官上限為30名，未來會視乎需求決定係咪要增加人數喎。