政情：岑智明一眼視力剩三成 難再觀星 索性觀雲
天文台前台長岑智明，去年二月退休之後，原打算前往瑞士日內瓦，為世界氣象組織擔任服務司司長，但誰知喺起程前一刻發覺視力有問題，急急腳入院做青光眼手術。事隔一年，岑話手術後狀況良好，不過其中一隻眼嘅視力就退化剩三成。
岑智明去年嘅眼疾並非事出突然，因為佢自小就知道自己對眼有毛病，中學時代仲試過瞳孔出血添。礙於眼疾，儘管岑對燦爛星空有濃厚興趣，但舉頭觀星就只得一片模糊，不過天性樂觀嘅岑智明就改為觀雲，仲由此培養出行山嘅嗜好。講起眼疾令佢失去到日內瓦履新嘅機會，其實岑智明大學畢業時，曾遇上到外國深造嘅機會，但由於佢係家中獨子，結果就選擇留喺香港發展，加入天文台一做就做到退休咁話。