政情：為訟費慳得就慳 尹兆堅想唔訂私飯
雖然懲教署會提供膳食，還押候審嘅人士可以向指定餐廳或供應商訂購「私飯」，不過價錢一般都比較貴。涉去年初選案而被控觸犯《港區國安法》嘅前議員尹兆堅（肥尹）目前遭到羈押，雖然都有訂「私飯」，但近來就考慮到訟費為家人帶嚟沉重經濟壓力，從而萌生取消訂購「私飯」嘅打算。
還押每月飯錢近$8000
肥尹嘅同事日前喺Facebook發文，指尹難行嘅前路，依家先至係開端，加上要面對多場官司，所負擔嘅訟費亦愈趨昂貴。由於一個月嘅「私飯」價錢動輒要近8,000元，肥尹唔想再為屋企人增添經濟壓力，所以現正考慮取消訂購，希望「慳得一蚊得一蚊」。
其實肥尹早前就透露好擔心屋企人嘅生計，因為佢辭任區議員驟變雙失中年。還押之後食「私飯」又多咗一筆開支，唔知佢最後點決定呢？