政情：在囚趙家賢 見到護士倍覺消暑
47名發起或參與去年民主派「35+」初選人士涉嫌違反《港區國安法》，被控「串謀顛覆國家政權罪」。當中被還押嘅東區區議會副主席趙家賢日前被拒保釋申請，同時決定放棄每8日可以申請一次嘅覆核權利。探監人士之前已經話趙家賢有高血壓、糖尿、五十肩等問題，頻頻進出醫院，尋日就有人話相信趙見到護士姐姐時，就猶如係佢雙眼「涼冷氣」嘅一刻喎。
獄中無啖好食 身體消瘦
兩名中西區區議員葉錦龍同任嘉兒早前去探望趙家賢，話喺現時烈日當空嘅日子，可以進入探訪室涼吓冷氣，對於在囚人士而言無疑係一個幸福嘅小時光。之不過趙家賢就唔同喇，葉話相信見到護士姐姐就係佢眼睛「涼冷氣」嘅一刻，仲話隔住個口罩都見到趙家賢笑添喎。
葉又話，雖然趙家賢望落精神咗唔少，但身體較以往消瘦，相信係因為獄中較少「三高飲食」。不過趙認為身體漸見消瘦都值得自豪喎，皆因佢指住自己嘅肚皮，再指住葉錦龍個肚腩，暗示對方肥咗啊。