政情：玩性情實測答問題 容海恩：我係港女
香港婦女向來精明能幹，但一講到「港女」，就畀人奄尖、拜金同勢利嘅印象。議員容海恩（Eunice）大玩港女實測，仲自爆實質就係一個地道嘅港女喎！唔知老公平日係咪都驚咗佢呢？
地道現實又貼地
Eunice日前出席網上訪談節目，同主持人對答前嘅熱身時段大玩港女測試。主持人枚舉9項港女特質，包括問佢係咪要求老公一定要送奢侈品做禮物、自拍後係咪一定要「P圖」，Eunice斷然否認，仲話自拍技巧公認最好。當問到佢鍾唔鍾意講是非，佢即刻話唔鍾意，跟住就指住自己對眼話寫住「大話」兩隻字。主持人又問佢一條語帶雙關嘅問題，就係EQ到底係點？Eunice否認自己EQ（情商）差，對方跟住話「即係你同議員葛珮帆（EQ）好熟喇！」
問咗9條有關港女特質嘅問題，Eunice統統否認，不過觀眾投票結果就顯示，有62%認為佢係港女。Eunice亦惟有自認係一個地道嘅港女、好現實又貼地，仲話香港女仔最講義氣，講心唔講金喎。咦，唔知Eunice係咪符合咗第10項港女條件，就係口不對心呢？