政情：促立會撐擴建堆填區 政府違碳中和目標 自相矛盾
港府早前話會爭取喺2050年前實現碳中和，之不過做嘅嘢就好似同計劃相反喎。有議員尋日喺立法會上話，廢物產生嘅碳排放量大部分來自堆填區，但政府依家仲想擴建新界西堆填區，咁依賴堆填區又點樣實現減碳呢？
工程界議員盧偉國話廢物管理產生嘅碳排放量有90%來自堆填區，擺脫依賴堆填區先可以實現深度減碳，但政府早前促請議員支持擴建新界西堆填區，佢就希望政府交代點樣先可以擺脫依賴堆填區處置廢物。
環境局局長黃錦星就話，為咗減少碳排放，政府已經喺廢物處理、能源供應、綠色建築同埋綠色金融等方面採取措施喇，長期目標係發展足夠轉廢為能嘅設施，擺脫依賴堆填區直接處理廢物。佢又話依家盡量減少唔同廢物管理設施，但喺轉型階段仍需要設施維持社會正常運作、作各方面平衡。雖然政府同議員考慮嘅角度不一，但政策都需要解釋清楚，否則聽落自相矛盾，議員又點支持呢？