政情：黃傑龍中學輕狂 撳門鐘險買「四仔」
大家讀書時期都難免有過「年少無知」，或者「年少輕狂」嘅經歷。稻苗學會會長黃傑龍（Simon）尋日喺社交平台貼文，指自己讀中五時有次想買卡拉OK影碟，點知就去咗間色情電影嘅舖頭，仲爭啲走唔到呀！
上唐樓大廈 想買卡拉OK碟
Simon話30年前自己正就讀中五，想買卡拉OK影碟，叫咗一個同學一齊去旺角行街買。佢哋去到一個唐樓大廈見到有好大個廣告牌寫住「各式影碟五花八門歡迎選購」，就行上去睇吓。
佢話上到去發現要先撳門鐘，入到去仲聽到門上咗鎖，即刻覺得唔對路。 然後有兩個大漢叫佢哋坐低慢慢揀，再畀咗幾本目錄佢哋睇，點知一打開全部都係色情電影嚟嘅！佢話當時惟有詐諦睇咗幾分鐘，嘗試搵吓有冇卡拉OK，點知真係冇喎。佢鼓起勇氣問：「請問有冇正常啲（口架）？」其中一個大漢好大聲講：「呢啲唔正常咩？」嚇到佢只好耷低頭唔夠膽出聲繼續揀，不過好彩最後大漢都無逼佢同埋朋友買色情電影，放咗佢哋走，都叫有道義喇！