政情：強檢不發病假紙 徐德義竟唔知
本港疫情反覆，市民因所居住大廈出現確診個案或曾接觸確診人士，需要隔離檢疫21日，唔少打工仔「手停口停」。立法會與預防及控制疾病相關的附屬法例小組委員會尋日開會，勞工界議員陸頌雄促政府參考2003年沙士疫情嘅做法，向受影響打工仔發放病假紙。但食物及衞生局副局長徐德義似乎唔太「熟書」，誤以為受影響市民離開時可領取病假紙，及後衞生署代表再作解釋該為檢疫證明書，被批評兩人說法有出入。
徐德義話以佢所知，當市民結束強制檢疫後，可向職員申請領取假紙。但衞生署緊急應變及項目管理處主任鄺國威就話市民喺檢疫期間如有需要，可申請檢疫證明文件作其他用途；至於病假紙受法例規限，署方需要先審視對方是否患病先可發放假紙。
稱要再檢討 陸頌雄好嬲
對於徐話發放病假紙安排需要待衞生署研究及認真討論，陸直言「好嬲」，斥政府已推行隔離措施一段時間，但仲係咁答，「有無搞錯」。陸又形容鄺話市民領取檢疫證明文件作其他用途嘅說法「好搞笑」，反問「唔通拎嚟留念咩，梗係用嚟拎病假」，特別喺沙士時期已有先例，對於局方嘅回應大感不滿。