政情：范國威退出政壇 唔再參選
《2021年公職（參選及任職）（雜項修訂）條例》已經刊憲生效，預計下個月將安排區議員宣誓。近月引起區議員辭職潮，因參與去年民主派「35+」初選、涉嫌違反《港區國安法》嘅前議員范國威，繼3月宣布因正被還押無法履行區議員職務，辭去西貢區議員一職後，尋日喺Facebook宣布退出新民主同盟，並正式退出香港政壇，唔會再發揮政治影響力同參與各級選舉。范又希望僅餘嘅日子陪伴太太及女兒，並照顧長期患病嘅家人。
跳船潮未止 再增兩區議員辭任
同樣已退出新同盟嘅西貢區議員梁里，早前有消息指佢因擔心會被判定宣誓無效而喪失議席，將辭任區議員，同時已經搵到新工作，梁當時沒正面回應。我哋尋日向民政事務總署查詢，獲確認梁已經辭咗職嘞！而有消息指梁嘅辭職將喺6月1日生效，但梁打算低調處理，唔公開宣布，而梁亦會出席今日同本周五嘅大會，而本周五嘅大會將會係佢議員生涯最後一次出席大會，辭職後佢會考慮移民英國或者法國。
另外，黃大仙區議員（竹園北選區） 鄭梓健尋日亦宣布決定辭任區議員，又指遺憾未能完成任期。佢話港區國安法公布之後，佢驚會從此失去自由，但眼見一啲同道中人先後入獄，而區議員宣誓猶如一把利劍掛在頭上，最終亦敵不過恐懼，故決定辭去黃大仙區議員一職。